Home » Cos cini e vecii d’Modna

Cos cini e vecii d’Modna

by redazione
Castellnuovo
Chi l’à vésta an pòl scurdèr,
la nostra Modna de ‘ssant’ an fa.
Là in fànd a Canèl Cèr
dove finiven tòtti el cà,
propria atach al Seminari
a gh’èra ‘na scalteina
e lè da bas a tott i urari
a trèva ‘na funtaneina.
A man stanca dàpp la mura,
lè in ‘na basa, i lavador
che al dànn cun vera cura
per pagn sporch er‘n al lavor.
Un tunnel lòngh sàta la mura,
al susur d’aqua d’un canèl,
e tott cal scur feva paura
cun la schèrsa lus d’un fanèl.
Un binari a Porta Castèl,
un àm cun ‘na bandiera in man
propria lè in mèz al Piazèl
d’nanz al treno pr’an fer di dan.
Cun la Màssa dal campanein
i dazier vriven i rastèe,
Urtlan… e làter col baruzein
avanti svelt, ma tòtt a pèe.
Là in Piaza in d’un balein
mounten banch e umbarloun,
banch ed pan, ài e rigadein;
tòtt quest sàta al campanoun.

Questo sito utilizza i cookie per migliorare la tua esperienza. Continuando cn la navigazione, dichiari di essere d'accordo con la nostra politica della privacy e l'utilizzo dei cookie di terze parti., ma puoi annullare l'iscrizione se lo desideri. Accetto Leggi di più